放咗一個禮拜假，仲辛苦過返工。呢個禮拜用嚟搬屋/執屋、入箱/拆箱、去10萬次宜家/日本城買千千萬萬個儲物盒。買到呀姐認得我👉🏻👈🏻。所以其實今個聖誕/新年，我唔係好感受到啲氣氛。
今日第一日返返工，不過啲客都係傻嘅。
1. 24歲仔話個覺得個肝唔好。佢話瞓得幾多都好都容易熱氣同肝火盛。。。。
話晒都係西醫呀！肝乜嘢火盛呀？？？？？去睇中醫好冇？？？？你當我係咩呀？內外全科中西醫紫青雙劍合璧！！！！
2. 我知依家天氣凍好多人感冒。唔該麻煩話要聽肺嘅時候，唔好一碌木坐喺度。你着10件羽絨郁唔郁，我點聽呢？一係就自己除衫，拉開拉鍊。一係就拿高件衫，俾個背脊我聽。我隔住10件冷衫聽，跟住話你個肺好清喎，你都唔信我啦？
我自己主動去摷你件衫我又覺得好似對你唔尊重。仲要有時啲女士嘅底衫連埋Sports Bra，摷完原來拿極都拿唔起個下好尷尬。
同埋其實聽肺唔係聽喺條腰度，你求其拿高件衫兩三吋係冇用架。
3. 講左10萬次，頂你個肺唔好對住我咳得唔得！阿伯覺得佢喉嚨痕而乾咳係冇問題。你唔係傷風緊咩？？！！佢對住我咳三次，我又對住佢講左三次，佢先至好似迴光返照咁，知道自己做錯野。媽呀！我要去洗面啊～～～～～～
～～～
圖1:自己買比自己嘅聖誕/新年/搬屋禮物🥚🍳🐥🐣
圖2: 聖誕小禮物加手信。個自家製聖誕曲奇有七、八款咁多，超甜但係好好食。
壓軸嘅圖3: 邪惡嘅姑娘2係我放假嘅時候叫左呢個海膽拼盤送去診所佢哋開party食！！獨食難肥呀😤！！Encore呀喂！！！！！！
Search